കുരിശിന്റെ വഴി

മരണത്തിനായ് വിധിച്ചു, കറയറ്റ ദൈവത്തിൻ കുഞ്ഞാടിനെ
അപരാധിയായ് വിധിച്ചു കല്മഷം കലരാത്ത കർത്താവിനെ.
അറിയാത്ത കുറ്റങ്ങൾ നിരയായ് ചുമത്തി പരിശുദ്ധനായ നിന്നിൽ;
കൈവല്യദാത, നിൻ കാരുണ്യം കൈകൊണ്ടോര്‍ കദനത്തിലാഴ്ത്തി നിന്നെ
അവസാനവിധിയിൽ നീയാലിവാർന്നു ഞങ്ങൾക്കയാരുളേണമേ നാകഭാഗ്യം.

മനുഷ്യകുലത്തിൻറെ പാപപ്പരിഹാരത്തിനുള്ള ബലി ആരംഭിച്ചുകഴിഞ്ഞു.. ഈശോ പീലാത്തോസിൻറെ മുമ്പിൽ നിൽക്കുന്നു… അവിടുത്തെ ഒന്നു നോക്കുക… ചമ്മട്ടിയടിയേറ്റ ശരീരം… രക്തത്തിൽ ഒട്ടിപ്പിടിച്ച വസ്ത്രങ്ങൾ… തലയിൽ മുൾമുടി…. ഉറക്കമൊഴിഞ്ഞ കണ്ണുകൾ…. ക്ഷീണത്താൽ വിറയ്ക്കുന്ന കൈകാലുകൾ… ദാഹിച്ചുവരണ്ട നാവ്…. ഉണങ്ങിയ ചുണ്ടുകൾ. പീലാത്തോസ് വിധിവാചകം ഉച്ചരിക്കുന്നു… കുറ്റമില്ലാത്തവൻ കുറ്റക്കാരനായി വിധിക്കപ്പെട്ടു… എങ്കിലും അവിടുന്ന് എല്ലാം നിശ്ശബ്ദനായി സഹിക്കുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

കുരിശു ചുമന്നിടുന്നു ലോകത്തിൻ വിനകൾ ചുമന്നിടുന്നു
നീങ്ങുന്നു ദിവ്യനാഥൻ നിന്ദനം നിറയും നിരത്തിലൂടെ.
"എൻ ജനമേ, ചൊല്‍ക ഞാനെന്തു ചെയ്തു കുരിശെൻ്റെ തോളിലേറ്റാൻ?
പൂന്തേൻ തുളുബുന്ന നാട്ടിൽ ഞാൻ നിങ്ങളെ ആശയോടാനയിച്ചു:
എന്തേ, യിദം നിങ്ങളെല്ലാം മറന്നെൻ്റെ ആത്മാവിനാതങ്കമേറ്റി?"

ഭാരമേറിയ കുരിശും ചുമന്നുകൊണ്ട് അവിടുന്നു മുന്നോട്ടു നീങ്ങുന്നു… ഈശോയുടെ ചുറ്റും നോക്കുക… സ്നേഹിതന്മാർ ആരുമില്ല… യൂദാസ് അവിടുത്തെ ഒറ്റിക്കൊടുത്തു… പത്രോസ് അവിടുത്തെ പരിത്യജിച്ചു… മറ്റു ശിഷ്യന്മാർ ഓടി ഒളിച്ചു… അവിടുത്തെ അത്ഭുതപ്രവൃത്തികൾ കണ്ടവരും അവയുടെ ഫലം അനുഭവിച്ചവരും ഇപ്പോൾ എവിടെ?… ഓശാന പാടി എതിരേറ്റവരും ഇന്നു നിശബ്ദരായിരിക്കുന്നു… ഈശോയെ സഹായിക്കുവാനോ, ഒരാശ്വാസവാക്കു പറയുവാനോ അവിടെ ആരുമില്ല…

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

കുരിശിൻറെ ഭാരത്താൽ തളർന്നു വീഴുന്നു നാഥൻ ധരണിയിൽ
മർദ്ദനമേറ്റു തളർന്ന ശരീരം വീഴുന്നു ഭാരത്താൽ.
കനിവറ്റയാതകർ കോപത്താൽ വീണ്ടും അടിക്കുന്നു നാഥനെ;
രക്തം പൊടിയുന്നു തിരുമെയ്യിൽ നിന്നാ സങ്കടം കണ്ടു നാം കേഴുക.

കുരിശിന്റെ ഭാരം ഈശോയെ തളർത്തി. തലയിലെ മുൾമുടി കൊണ്ടുണ്ടായ വേദന, ഉറക്കമില്ലായ്മ, ചമ്മട്ടിയടിയേറ്റ ശരീരം, ഭാരമേറിയ കുരിശ് - ഈശോയ്ക്ക് മുന്നോട്ട് നടക്കാൻ കഴിയുന്നില്ല. അവിടുന്ന് നിലത്തു വീഴുന്നു. കുരിശ് അവിടുത്തെ ശരീരത്തെ അമർത്തുന്നു. പടയാളികൾ അവിടുത്തെ നിർദ്ദയം അടിക്കുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

കണ്ണുനീർ വാർത്തു കരഞ്ഞു വരുന്നൊരു മാതാവതാ വഴിയിൽ
അരുമക്കിടാവിൻ്റെ ദയനീയരൂപം കണ്ടു തളരുന്നു മാതാവ്.
അലറുന്ന ജനക്കൂട്ടം, പടയാളികൾ, ആയുധമേന്തിയവർ;
അവരുടേയിടയിലാ മാതാവിൻ ഹൃദയം വാളാൽ പിളർന്നുപോയി.

കാൽവരിയിലേക്കുള്ള യാത്രയിൽ ഈശോ തൻറെ പ്രിയ മാതാവിനെ കാണുന്നു. ആ അമ്മയുടെ ഹൃദയം സങ്കടത്താൽ തകർന്നിരിക്കുന്നു. തൻറെ ഓമനപ്പുത്രന്റെ ഈ ദയനീയരൂപം കാണാൻ ആ അമ്മയ്ക്ക് എങ്ങനെ കഴിയും? അവരുടെ കണ്ണുകൾ പരസ്പരം ഉടക്കുന്നു. അവിടുത്തെ വേദന അമ്മയുടെയും വേദനയാണ്.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

കുരിശുവഹിച്ചു വലഞ്ഞീടും നാഥനെ സഹായിക്കാനായ്
ശിമയോൻ വരുന്നു, കുരിശിൻ്റെ ഭാരം ഒട്ടു കുറഞ്ഞീടാൻ.
നാഥനെ സഹായിക്കാൻ നാം ആരുമില്ലാതെ പോയി!
പാവങ്ങൾക്കായ് നാം ചെയ്യും നന്മകളത്രയും നാഥനു നൽകും സഹായം തന്നേ.

പടയാളികൾ കിറേനേക്കാരനായ ശിമയോനെക്കൊണ്ട് ഈശോയുടെ കുരിശു ചുമപ്പിക്കുന്നു. ഈശോയുടെ ക്ഷീണം കണ്ടതുകൊണ്ടല്ല, കാൽവരിയിലെത്തും മുമ്പ് അവിടുന്ന് മരിച്ചേക്കുമെന്ന് അവർ ഭയന്നതുകൊണ്ടാണ് അവർ അവനെ നിർബന്ധിച്ചത്. ശിമയോൻ ആ കുരിശ് ഏറ്റെടുക്കുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

താപമകറ്റാനായ് സ്നേഹാർദ്രയായൊരു വെറോനിക്ക വന്നണഞ്ഞു
തിരുമുഖം തുടച്ചു, രക്തം തുടച്ചു, സ്നേഹം ചൊരിഞ്ഞവൾ.
അവളുടെ തൂവാല തന്നിലതാ, തിരുമുഖം പതിയുന്നു.
നാഥൻറെ തിരുമുഖം എൻ്റെയും ഹൃദയത്തിൽ സ്നേഹത്താൽ പതിയേണമേ.

ഭക്തയായ വെറോനിക്ക പടയാളികളെ വകവയ്ക്കാതെ ഈശോയുടെ അടുത്തേക്ക് ഓടിച്ചെല്ലുന്നു. രക്തവും വിയർപ്പും കലർന്ന ആ തിരുമുഖം അവൾ തൻറെ തൂവാലകൊണ്ട് തുടയ്ക്കുന്നു. അവിടുന്ന് തൻറെ തിരുമുഖം ആ തൂവാലയിൽ പതിപ്പിച്ചു നൽകി അവളെ അനുഗ്രഹിച്ചു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

പാപഭാരത്താൽ വലഞ്ഞു വീഴുന്നു നാഥൻ വീണ്ടും
അടിയേറ്റു തളർന്നു, കുരിശിൻ്റെ ഭാരം താങ്ങാൻ കഴിയാതെ.
മനുഷ്യൻ്റെ പാപങ്ങൾ, അവർ ചെയ്യും തിന്മകൾ, നാഥനെ വീഴ്ത്തുന്നു.
എന്നിലെ പാപങ്ങൾ ഓർത്തു ഞാൻ കേഴുന്നു, നാഥാ ക്ഷമിക്കണമേ.

ഈശോ കാൽവരിയിലേക്കുള്ള വഴിയിൽ വീണ്ടും വീഴുന്നു. ശരീരത്തിലെ മുറിവുകളിൽ നിന്നുള്ള വേദന അസഹനീയമാണ്. പടയാളികളുടെ മർദ്ദനം അവിടുത്തെ വീണ്ടും എഴുന്നേൽക്കാൻ പ്രേരിപ്പിക്കുന്നു. എൻറെ പാപങ്ങളാണ് അവിടുത്തെ ഇത്രയധികം തളർത്തിയത്.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

ഓർശ്ലം നഗരിതൻ പുത്രിമാരെ, എന്നെയോർത്തു നിങ്ങൾ കരയേണ്ട
നിങ്ങളെയോർത്തും, നിൻ മക്കളെയോർത്തും കണ്ണുനീർ വാർക്കുവിൻ.
ഉണങ്ങിയ മരത്തോടിതു ചെയ്തുവെങ്കിൽ, പച്ചമരത്തോടു എന്താകും?
നാഥൻ്റെ വാക്കുകൾ കേട്ടു നാം ഓർക്കുക, നമ്മളെയോർത്തു കരയുക.

ഈശോയെ അനുഗമിച്ചിരുന്ന സ്ത്രീകളിൽ പലരും അവിടുത്തെ ഓർത്തു വിലപിച്ചു. ഈശോ അവരോട് പറയുന്നു: 'ഓർശ്ലം പുത്രിമാരെ, എന്നെയോർത്തു നിങ്ങൾ കരയേണ്ട; നിങ്ങളെയോർത്തും നിങ്ങളുടെ മക്കളെയോർത്തും കരയുവിൻ.' സ്വന്തം പാപങ്ങളെക്കുറിച്ചോർത്തു പശ്ചാത്തപിക്കാനാണ് അവിടുന്ന് നമ്മെ ഓർമ്മിപ്പിക്കുന്നത്.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

മുന്നിൽ കുരിശുമല, പിന്നിൽ പടയാളികൾ, നാഥൻ വലയുന്നു
മൂന്നാം വട്ടവും വീഴുന്നു നാഥൻ കുരിശിൻ്റെ ഭാരത്താൽ.
എന്നിലെ പാപങ്ങൾ, എൻ്റെ ദുശ്ശീലങ്ങൾ, നാഥനെ വീഴ്ത്തുന്നു.
നാഥാ, നിൻ വേദന കണ്ടു ഞാൻ കേഴുന്നു, എൻ പാപം പൊറുക്കണമേ.

കാൽവരിയുടെ മുകളിലെത്താറായപ്പോൾ ഈശോ മൂന്നാം പ്രാവശ്യവും വീഴുന്നു. അവിടുത്തെ ശക്തി പൂർണ്ണമായും നശിച്ചിരിക്കുന്നു. എങ്കിലും തൻറെ ജീവൻ മനുഷ്യനുവേണ്ടി ബലിയർപ്പിക്കാനുള്ള സ്നേഹം അവിടുത്തെ വീണ്ടും എഴുന്നേൽക്കാൻ സഹായിക്കുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

എന്തിനി ക്രൂരതയെന്തിനി ധിക്കാരം പാവനരൂപനിൽ?
വസ്ത്രങ്ങളുരിഞ്ഞെടുക്കുന്നു ക്രൂരർ, നാഥൻ നിശബ്ദനായ്.
രക്തത്തിലൊട്ടിയ വസ്ത്രങ്ങൾ നീക്കുമ്പോൾ വേദനയെത്രയോ!
ലോകത്തിൻ മുൻപിൽ നഗ്നനായ് നിൽക്കുന്നു നാഥനെൻ രക്ഷയ്ക്കായ്.

പടയാളികൾ ഈശോയുടെ വസ്ത്രങ്ങൾ ഉരിഞ്ഞെടുക്കുന്നു. രക്തം കട്ടപിടിച്ച മുറിവുകളിൽ ഒട്ടിപ്പിടിച്ചിരുന്ന വസ്ത്രങ്ങൾ വലിച്ചുരിഞ്ഞപ്പോൾ അവിടുന്ന് എത്രമാത്രം വേദനിച്ചിട്ടുണ്ടാകും! അവിടുന്ന് എല്ലാവരുടെയും മുമ്പിൽ നഗ്നനാക്കപ്പെടുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

കുരിശിൽ കിടത്തി തറച്ചു നിൻ കൈകളും കാലുകളും ദൃഢമായ്
ആണി തറയ്ക്കുന്ന ശബ്ദം മുഴങ്ങുന്നു കാൽവരി കുന്നിന്മേൽ.
നാഥൻറെ വാക്കുകൾ കേൾക്കുക നാം: "പിതാവേ ഇവർക്കു ക്ഷമിക്കണമേ,
ചെയ്യുന്നതെന്തെന്നിവരറിയുന്നില്ല" നാഥൻറെ സ്നേഹമെത്ര മഹാത്ഭുതം!

ഈശോയെ കുരിശിൽ കിടത്തി കൈകളിലും കാലുകളിലും ആണികൾ തറയ്ക്കുന്നു. അസഹനീയമായ വേദന! എങ്കിലും അവിടുന്ന് തൻറെ ശത്രുക്കൾക്കുവേണ്ടി പ്രാർത്ഥിക്കുന്നു: 'പിതാവേ, ഇവർ ചെയ്യുന്നതെന്താണെന്ന് ഇവർ അറിയുന്നില്ല; ഇവർക്കു ക്ഷമിക്കണമേ.'

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

ഇരുളുന്നു സൂര്യൻ, വിറയ്ക്കുന്നു ഭൂമി, നാഥൻ മരിക്കുന്നു
നാഥൻറെ ജീവൻ വെടിയുന്നു നമ്മൾക്കായ്, കുരിശിൽ തൂങ്ങിമരിച്ചു.
സ്നേഹത്തിൻ പൂർണ്ണതയാമിക്കരിശിൽ നാഥൻ മരിക്കുന്നു.
പാപങ്ങൾ പൊറുക്കാനും രക്ഷ നൽകാനും നാഥൻ മരിക്കുന്നു.

(എല്ലാവരും മുട്ടുകുത്തുന്നു) കുരിശിൽ മൂന്നുമണിക്കൂർ നേരം അവിടുന്ന് വേദനയനുഭവിച്ചു. അവിടുന്ന് ഉറക്കെ നിലവിളിച്ചു പറഞ്ഞു: 'എല്ലാം പൂർത്തിയായിരിക്കുന്നു; പിതാവേ, എൻറെ ആത്മാവിനെ അങ്ങയുടെ കരങ്ങളിൽ ഞാൻ സമർപ്പിക്കുന്നു.' ഇത്രയും പറഞ്ഞ് അവിടുന്ന് ജീവൻ വെടിഞ്ഞു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

അരുമക്കിടാവിൻറെ ചേതനയറ്റൊരു ദേഹം വഹിച്ചുകൊണ്ട്
മാതാവിരിക്കുന്നു സങ്കടത്താൽ തൻറെ ഹൃദയം പിളർന്നവളായ്.
മകൻറെ തിരുമുറിവുകളിൽ കണ്ണീർ ചൊരിയുന്നു മാതാവ്.
അമ്മേ, നിൻ സങ്കടം എൻ്റെയും സങ്കടം, എന്നെയും കാക്കണമേ.

ഈശോയുടെ മൃതദേഹം കുരിശിൽ നിന്നിറക്കി മാതാവിൻറെ മടിയിൽ കിടത്തുന്നു. ആ അമ്മയുടെ സങ്കടം ആർക്കുവർണ്ണിക്കാൻ കഴിയും! ജീവനില്ലാത്ത തൻറെ പ്രിയപുത്രനെ മാതാവ് കെട്ടിപ്പിടിച്ചു കരയുന്നു. എൻറെ പാപങ്ങളാണ് ആ അമ്മയെ ഇത്രത്തോളം സങ്കടപ്പെടുത്തിയത്.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.

അന്ത്യോപചാരങ്ങളർപ്പിച്ചു ഭക്തിയായ് നാഥനെ അടക്കുന്നു
കല്ലറ തന്നിലടക്കി നാഥനെ, ശിഷ്യരും മാതാവും.
ഉയിർത്തെഴുന്നേൽക്കുമെന്നാശയാൽ നമ്മൾ കാത്തിരിക്കുന്നു.
നാഥാ, നിൻ കൂടെ ഉയിർക്കുവാനായ് ഞങ്ങളെ അനുഗ്രഹിക്കണമേ.

ശിഷ്യന്മാർ ഈശോയുടെ മൃതദേഹം ഒരു പുതിയ കല്ലറയിൽ സംസ്കരിക്കുന്നു. അവിടുന്ന് മരണത്തെ ജയിച്ചു മൂന്നാം നാൾ ഉയിർത്തെഴുന്നേൽക്കുമെന്ന് അവർക്കറിയാം. മരണത്തിൽ അവസാനിക്കുന്നതല്ല മനുഷ്യജീവിതം എന്ന് ഈശോ നമ്മെ പഠിപ്പിക്കുന്നു.

(1 സ്വർഗ്ഗസ്ഥനായ..., 1 നന്മ നിറഞ്ഞ..., 1 ത്രിത്വസ്തുതി.)
കർത്താവേ അനുഗ്രഹിക്കണമേ.
പരിശുദ്ധ ദൈവമാതാവേ, ക്രൂശിതനായ കർത്താവിൻറെ തിരുമുറിവുകൾ എൻറെ ഹൃദയത്തിൽ പതിപ്പിച്ചുറപ്പിക്കണമേ.