വിശുദ്ധ ഗീവർഗ്ഗീസ് സഹദായോടുള്ള നൊവേന

കാർമ്മി: ഈശോയുടെ ഉത്തമശിഷ്യനായ വി. ഗീവർഗ്ഗീസ് സഹദായെ (സമൂഹവും ചേർന്ന്)/ അങ്ങേ മാദ്ധ്യസ്ഥം വഴിയായി ലഭിക്കുന്ന അനേകം അനുഗ്രഹങ്ങളെ/ ഞങ്ങൾ നന്ദിയോടെ സ്മരിക്കുന്നു./ ദൈവ സന്നിധിയിലുള്ള അങ്ങയുടെ മാദ്ധ്യസ്ഥശക്തിയിൽ ഞങ്ങൾ ദൃഢമായി ശരണപ്പെടുന്നു./ ദുഃഖത്താൽ വലയുന്ന അങ്ങേ വത്സലമക്കൾക്ക്/ ആവശ്യമായ എല്ലാ അനുഗ്രഹങ്ങളും/ ധാരാളമായി ഈശോയിൽ നിന്നും ഞങ്ങൾക്ക് വാങ്ങിത്തരുന്നതിന് അങ്ങ് സദാ സന്നദ്ധനാണെന്ന്/ ഞങ്ങൾ ദൃഡമായി വിശ്വസിക്കുന്നു./ പുണ്യപിതാവേ, ഞങ്ങളുടെ ആദ്ധ്യാത്മികവും ഭൗതികവുമായ/ എല്ലാ ആവശ്യങ്ങളിലും/ അങ്ങ് ഞങ്ങൾക്ക് തുണയും സഹായവുമായിരിക്കണമേ./ വിഷഭയത്തിൽ നിന്നും പൈശാചിക ഉപദ്രവങ്ങളിൽ നിന്നും/ ഞങ്ങളെ കാത്തുരക്ഷിക്കുന്നതിനുള്ള/ അമൂല്യമായ വരം ലഭിച്ചിരിക്കുന്ന സ്നേഹപിതാവേ/ ഞങ്ങളുടെ ആവശ്യങ്ങളിൽ ഞങ്ങളുടെ സഹായത്തിനെത്തണമേ, ആമ്മേൻ.

---

സങ്കീർത്തനം (31)

കാർമ്മി: കർത്താവേ ഞാൻ അങ്ങിൽ അഭയം തേടുന്നു, എന്നെ നിരാശനാക്കരുതേ
സമൂ: നീതിമാനായ കർത്താവേ, അങ്ങുന്ന് എന്നെ രക്ഷിക്കണമേ
കാർമ്മി: എന്റെ പ്രാർത്ഥന ചെവിക്കൊള്ളുകയും പ്രത്യുത്തരമരുളുകയും ചെയ്യണമേ
സമൂ: അങ്ങുന്നെന്റെ അഭയവും സഹായവുമാകുന്നു, എന്നെ പരിപാലിക്കണമേ
കാർമ്മി: അങ്ങെന്റെ ആശ്രയവും ബലവുമാകുന്നു, അങ്ങേ നാമത്തെ പ്രതി എന്നെ ആശ്വസിപ്പിക്കണമേ
സമൂ: ശത്രുവിന്റെ കെണിയിൽ നിന്ന് എന്നെ രക്ഷിക്കണമേ, എന്തെന്നാൽ അങ്ങ് എന്റെ സഹായമാകുന്നു.
കാർമ്മി: അങ്ങേ തൃക്കരങ്ങളിൽ എന്റെ ആത്മാവിനെ ഞാൻ സമർപ്പിക്കുന്നു.
സമൂ: വിശ്വസ്തനായ കർത്താവേ, അങ്ങുന്ന് എന്റെ രക്ഷകനാകുന്നു.
കാർമ്മി: പിതാവിനും പുത്രനും പരിശുദ്ധാത്മാവിനും സ്തുതി
സമൂ: ആദിമുതൽ എന്നേക്കും, ആമ്മേൻ,

---

കാറോസൂസ

കാർമ്മി: നമുക്കെല്ലാവർക്കും വിശ്വാസത്തോടും പ്രതീക്ഷയോടും കൂടെ ദൈവകൃപയിൽ ആശ്രയിച്ചുകൊണ്ട് വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ എന്ന് പ്രാർത്ഥിക്കാം.
സമൂ: വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ.

കാർമ്മി: അക്രമവും അനീതിയും യുദ്ധങ്ങളും അവസാനിപ്പിച്ച് ലോകരാഷ്ട്രങ്ങളെല്ലാം ശാന്തിയിലും സമാധാനത്തിലും ജീവിക്കുവാൻ,
സമൂ: വി. ഗീവർഗ്ഗീസ് സഹദായേ ഈശോയോട് അപേക്ഷിക്കണമേ.

കാർമ്മി: സാർവ്വത്രികസഭയുടെ തലവനായ പരിശുദ്ധ പിതാവിനും, ഞങ്ങളുടെ സഭയുടെ പിതാവും തലവനുമായ മേജർ ആർച്ചുബിഷപ്പിനും, ഞങ്ങളുടെ അതിരൂപതാദ്ധ്യക്ഷനും എല്ലാ വൈദികമേലദ്ധ്യക്ഷന്മാർക്കും ഭരമേത്പിക്കപ്പെട്ടിരിക്കുന്ന ഉത്തരവാദിത്വങ്ങൾ ദൈവഹിതാനുസരണം നിർവ്വഹിക്കപ്പെടുവാൻ,
സമൂ: വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ.

കാർമ്മി: ഞങ്ങളുടെ രൂപതയും, ഞങ്ങളുടെ പിതാവും മേലദ്ധ്യക്ഷനുമായ മെത്രാനും, എല്ലാ വൈദികരും സമർപ്പിതരും അനുഗ്രഹിക്കപ്പെടുവാനും തീക്ഷ്ണതയുള്ള അത്മായ പ്രേഷിതരെ ഞങ്ങൾക്കു ലഭിക്കുവാനും
സമൂ: വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ.

കാർമ്മി: ഒരേ പിതാവിന്റെ മക്കളേപ്പോലെ ഈ ഇടവകാംഗങ്ങളെല്ലാവരും പരസ്പരം സ്നേഹിച്ചും സഹകരിച്ചും പ്രവർത്തിക്കുന്നതിന്
സമൂ: വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ.

കാർമ്മി: ഞങ്ങളുടെ കുടുംബങ്ങളിൽ സമാധാനവും ശാന്തിയും പുലരുവാനും ഞങ്ങളുടെ കുഞ്ഞുങ്ങളും യുവജനങ്ങളും വിശുദ്ധിയിലും വിജ്ഞാനത്തിലും ദൈവത്തിന്റെയും മനുഷ്യരുടെയും പ്രീതിയിലും വളർന്നുവരുവാനും,
സമൂ: വി. ഗീവർഗ്ഗീസ് സഹദായേ, ഈശോയോട് അപേക്ഷിക്കണമേ.

(സന്ദർഭോചിതമായി മറ്റ് നിയോഗങ്ങളും കൂട്ടിച്ചേർക്കാവുന്നതാണ്)

കാർമ്മി: നിശ്ശബ്ദമായി നമ്മുടെ വ്യക്തിപരമായ പ്രാർത്ഥനകൾ വി. ഗീവർഗ്ഗീസ് സഹദായുടെ മാദ്ധ്യസ്ഥം വഴി ദൈവതിരുസന്നിധിയിൽ സമർപ്പിക്കാം (നിശ്ശബ്ദം)

കാർമ്മി: കർത്താവായ ദൈവമേ, അങ്ങയുടെ വിശ്വസ്ത ദാസനും ഞങ്ങളുടെ പ്രത്യേക മദ്ധ്യസ്ഥനുമായ വി. ഗീവർഗ്ഗീസിന്റെ യോഗ്യതകൾ പരിഗണിച്ച് ഞങ്ങളുടെ പ്രാർത്ഥനകളും യാചനകളും സ്വീകരിച്ച് ഞങ്ങളെ എല്ലാവരെയും അനുഗ്രഹിക്കണമേ. അത്യാഹിതങ്ങളിൽ നിന്ന് ഞങ്ങളെ സംരക്ഷിച്ച്, ആരോഗ്യവും ദീർഘായുസ്സും നല്കണമേ. വിഷജന്തുക്കളിൽ നിന്നും അപകട സാഹചര്യങ്ങളിൽ നിന്നും ഞങ്ങളെ കാത്തുകൊള്ളണമേ. ഞങ്ങളുടെ വളർത്തുമൃഗങ്ങളെ സംരക്ഷിക്കുകയും നല്ല കാലാവസ്ഥയും സമൃദ്ധമായ വിളവുകളും നല്കി അനുഗ്രഹിക്കുകയും ചെയ്യണമേ. സകലത്തിന്റെയും നാഥാ, എന്നേക്കും
സമൂ: ആമ്മേൻ.

---

ഗാനം

(ഈ സമയത്ത് കാർമ്മികൻ ജനങ്ങളുടെ മേൽ വിശുദ്ധജലം തളിക്കുന്നു.)

രക്തസാക്ഷിയാം ഗീവർഗ്ഗീസ് താതാ
ഞങ്ങൾക്കായ് എന്നും പ്രാർത്ഥിക്ക
സ്വർഗ്ഗലോകത്തിലെത്തുവാനെന്നും
മാർഗ്ഗം ഞങ്ങൾക്ക് കാട്ടേണമേ

മാനസങ്ങളിൽ ദൈവസ്നേഹമാ-
മഗ്നിയുജ്ജ്വലിപ്പിക്കുവാൻ
ഈശോ നല്കിയ സത്യമാർഗ്ഗത്തി-
ലുൾക്കരുത്തോടെ നില്ക്കുവാൻ (2)

---

കാർമ്മി: അനീതിക്കെതിരായി (സമൂഹവും ചേർന്ന്)/ ധീരമായി പോരാടുകയും/ സത്യവിശ്വാസം പ്രചരിപ്പിക്കുന്നതിന് തീക്ഷ്ണമായി പരിശ്രമിക്കുകയും/ വിശ്വാസത്തിനുവേണ്ടി അതികഠിനമായ പീഡനങ്ങൾ സഹിച്ച്/ രക്തസാക്ഷിത്വം വരിക്കുകയും ചെയ്ത/ വി. ഗീവർഗ്ഗീസ് സഹദായെ/ ഞങ്ങൾക്കെന്നും സഹായമരുളുന്ന/ മദ്ധ്യസ്ഥനായി നല്കിയ പരമകാരുണ്യവാനായ ദൈവമേ/ ഞങ്ങളങ്ങയെ സ്തുതിക്കുന്നു./ ഞങ്ങളുടെ നിസ്സഹായാവസ്ഥയിൽ ഞങ്ങൾ അങ്ങയുടെ സന്നിധിയിൽ അണയുന്നു./ ഞങ്ങൾക്കുവേണ്ടി പ്രാർത്ഥിക്കുന്ന വി. ഗീവർഗ്ഗീസിന്റെ സുകൃതങ്ങൾ പരിഗണിച്ച്/ ഞങ്ങളുടെ ആവശ്യങ്ങൾ സാധിച്ചുതരണമെന്ന്/ ഈശോമിശിഹായുടെ നാമത്തിൽ ഞങ്ങൾ അങ്ങയോട് അപേക്ഷിക്കുന്നു./ ആമ്മേൻ.

കാർമ്മി: ഈശോമിശിഹായുടെ വാഗ്ദാനങ്ങൾക്ക് ഞങ്ങൾ യോഗ്യരാകുവാൻ
സമൂ: വി. ഗീവർഗ്ഗീസ് സഹദായേ, ഞങ്ങൾക്കുവേണ്ടി അപേക്ഷിക്കണമേ.