വിശുദ്ധ അൽഫോൻസാമ്മയോടുള്ള നൊവേന

കാർമ്മി: സ്നേഹസമ്പന്നനും പരമകാരുണികനുമായ ഈശോയേ (സമൂഹവും ചേർന്ന്)/ അങ്ങയുടെ പരിപാലന ഞങ്ങൾ അനുസ്മരിക്കുന്നു./ ഭാരതമക്കളുടെ എല്ലാ ആവശ്യങ്ങളിലും സഹായിക്കുവാൻ/ വിശുദ്ധ അൽഫോൻസാമ്മയെ തിരഞ്ഞെടുത്തതിന്/ ഞങ്ങൾ നന്ദി പറയുന്നു./ ഒരു സ്നേഹബലിയായി/ സ്വയം അർപ്പിക്കുവാൻ/അൽഫോൻസാമ്മയെ പ്രാപ്തയാക്കിയ ഈശോയെ/ വിശ്വാസം, ശരണം, ഉപവി എന്നീ ദൈവീകസുകൃതങ്ങളിലും,/ ദാരിദ്ര്യം, കന്യാവ്രതം, അനുസരണം എന്നീ സുവിശേഷപുണ്യങ്ങളിലും/ അവളെ അതിശയകരമാം വിധം അങ്ങു വളർത്തി./ വിശുദ്ധിയുടെ പാതയിൽ സ്ഥിരതയോടെ മുന്നേറിയ അവളെ/ രോഗം മൂലമുള്ള സഹനത്തിലൂടെ അങ്ങു വിശുദ്ധീകരിച്ച്/ രോഗികൾക്കുള്ള ആലംബമാക്കി./ പാപങ്ങളെക്കുറിച്ച് അനുതപിച്ച്/ തങ്ങളുടെ നിസ്സഹായത ഏറ്റു പറയുന്നവരെ/ അനുഗ്രഹിക്കുന്ന മദ്ധ്യസ്ഥയായി/ വിശുദ്ധ അൽഫോൻസാമ്മയെ നല്കിയതിന്/ ഞങ്ങൾ നിനക്ക് നന്ദി പറയുന്നു./ സകലത്തിന്റെയും നാഥാ, എന്നേക്കും. ആമ്മേൻ/

---

സങ്കീർത്തനം (91)

കാർമ്മി: എന്നോടു പ്രാർത്ഥിച്ചതുകൊണ്ട് ഞാനവനെ രക്ഷിക്കും. എന്റെ നാമം അറിഞ്ഞതുകൊണ്ട്/ ഞാനവനെ ശക്തിപ്പെടുത്തും.
സമൂ: എന്നെ വിളിച്ചപേക്ഷിക്കുമ്പോൾ ഞാനവനുത്തരമരുളും
കാർമ്മി: അവന്റെ സങ്കടകാലങ്ങളിൽ/ ഞാനവന്റെ കൂടെയുണ്ടായിരിക്കും
സമൂ: ശക്തിയും ബഹുമാനവും അവനു ഞാൻ നല്കും
കാർമ്മി: ദീർഘായുസ്സ് നല്കിക്കൊണ്ട്/അവനെ ഞാൻ തൃപ്തനാക്കും.
സമൂ: രക്ഷിക്കുവാനുള്ള എന്റെ കഴിവ്/ അവനെ കാണിക്കുകയും ചെയ്യും
കാർമ്മി: പിതാവിനും പുത്രനും പരിശുദ്ധാത്മാവിനും സ്തുതി
സമൂ: ആദിമുതൽ എന്നേക്കും, ആമ്മേൻ

---

കാറോസൂസ

കാർമ്മി: നമുക്കെല്ലാവർക്കും വിശ്വാസത്തോടും പ്രതീക്ഷയോടും കൂടെ ദൈവകൃപയിൽ ആശ്രയിച്ചുകൊണ്ട് വി. അൽഫോൻസാമ്മേ, ഈശായോട് അപേക്ഷിക്കണമേ എന്ന് പ്രാർത്ഥിക്കാം.
സമൂ: വി. അൽഫോൻസാമ്മേ, ഈശോയോട് അപേക്ഷിക്കണമേ

കാർമ്മി: അക്രമവും അനീതിയും യുദ്ധങ്ങളും അവസാനിപ്പിച്ച് ലോക രാഷ്ട്രങ്ങളെല്ലാം ശാന്തിയിലും സമാധാനത്തിലും ജീവിക്കുവാൻ,
സമൂ: വി. അൽഫോൻസാമ്മേ, ഈശോയോട് അപേക്ഷിക്കണമേ.

കാർമ്മി: സാർവ്വത്രികസഭയുടെ തലവനായ പരിശുദ്ധ പിതാവിനും, എല്ലാ വൈദികമേലദ്ധ്യക്ഷന്മാർക്കും ഭരമേത്പ്പിക്കപ്പെട്ടിരിക്കുന്ന ഉത്തരവാദിത്വങ്ങൾ ദൈവഹിതാനുസരണം നിർവ്വഹിക്കപ്പെടുവാൻ,
സമൂ: വി. അൽഫോൻസാമ്മേ ഈശോയോട് അപേക്ഷിക്കണമേ

കാർമ്മി: ഞങ്ങളുടെ കുടുംബങ്ങളിൽ സമാധാനവും ശാന്തിയും പുലരുവാനും ഞങ്ങളുടെ കുഞ്ഞുങ്ങളും യുവജനങ്ങളും വിശുദ്ധിയിലും വിജ്ഞാനത്തിലും വളർന്നുവരുവാനും,
സമൂ: വി. അൽഫോൻസാമ്മേ, ഈശോയോട് അപേക്ഷിക്കണമേ

കാർമ്മി: നിശ്ശബ്ദമായി നമ്മുടെ വ്യക്തിപരമായ പ്രാർത്ഥനകൾ വി. അൽഫോൻസാമ്മയുടെ മാദ്ധ്യസ്ഥം വഴി സമർപ്പിക്കാം. (നിശ്ശബ്ദം)
കാർമ്മി: കർത്താവേ അങ്ങ് പരിശുദ്ധനാകുന്നു. പരിശുദ്ധിയിലേക്ക് അങ്ങ് ഞങ്ങളെ വിളിക്കുന്നു. സകലത്തിന്റെയും നാഥാ, എന്നേക്കും,
സമൂ: ആമ്മേൻ.

---

ഗാനം

സഹനത്തിൻ പുണ്യപുത്രീ
യേശുവിൻ സ്നേഹസൂനമേ
അൽഫോൻസാ ധന്യേ നിന്നിൽ ആശ്രയം
തേടിയെത്തും ദാസരെ കാത്തിടേണേ
സുരലോക ശാന്തി നല്കി ഞങ്ങളെ
സ്വർഗ്ഗീയ നന്മയാൽ നിറച്ചു നീ
രോഗവും വൈരവും പോക്കി നീ
ശുദ്ധരാക്കി സ്വർഗ്ഗദൂതരാക്കി നീ

---

കാർമ്മി: ഈശോ നാഥാ (സമൂഹവും ചേർന്ന്)/ അങ്ങേ ദിവ്യഹൃദയത്തിലെ മുറിവിൽ/ ഞങ്ങളെ മറയ്ക്കണമേ./ സ്നേഹിക്കപ്പെടുവാനും വിലമതിക്കപ്പെടുവാനുമുള്ള/ ആശയിൽ നിന്നും ഞങ്ങളെ വിമുക്തരാക്കണമേ./ കീർത്തിയും ബഹുമാനവും സമ്പാദിക്കണമെന്നുള്ള/ ആശയിൽ നിന്നും ഞങ്ങളെ രക്ഷിക്കണമേ./ ഒരു പരമാണുവും/ അങ്ങേ ദിവ്യഹൃദയത്തിലെ/ സ്നേഹാഗ്നിജ്വാലയിലെ ഒരു പൊരിയും ആകുന്നതുവരെ/ ഞങ്ങളെ എളിമപ്പെടുത്തണമേ./ സൃഷ്ടികളെയും ഞങ്ങളെത്തന്നെയും/ മറന്നുകളയുന്നതിനുള്ള അനുഗ്രഹം തരണമേ./ മാധുര്യവാനായ ഈശോയെ ലൗകികാശ്വാസങ്ങളെല്ലാം ഞങ്ങൾക്ക് കയ്പായി പകർത്തണമേ/ നീതിസൂര്യനായ ഇശോയെ/ അങ്ങയുടെ ദിവ്യകതിരിനാൽ ഞങ്ങളുടെ ബോധത്തെ തെളിയിച്ച് /ബുദ്ധിയെ പ്രകാശിപ്പിച്ച്, ഹൃദയത്തെ ശുദ്ധീകരിച്ച്/ അങ്ങയുടെ നേരെയുള്ള സ്നേഹത്താലെരിയിച്ച്/ ഞങ്ങളെ നിന്നോടൊന്നിപ്പിക്കണമേ, ആമ്മേൻ.

കാർമ്മി: ഈശോമിശിഹായുടെ വാഗ്ദാനങ്ങൾക്ക് ഞങ്ങൾ യോഗ്യരാകുവാൻ
സമൂ: വി. അൽഫോൻസാമ്മേ, ഞങ്ങൾക്കുവേണ്ടി അപേക്ഷിക്കണമേ.